കാസർഗോഡ്: വൈദ്യുതലൈനിൽ നിന്ന് തീപ്പൊരി വീണുണ്ടായ തീപിടിത്തത്തിൽ കെഎസ്ഇബിയുടെയും കെ-ഫോണിന്റെയും കേബിളുകൾ കത്തിനശിച്ച് അരക്കോടിയിലേറെ രൂപയുടെ നഷ്ടം.
വെള്ളിയാഴ്ച വൈകുന്നേരം 4.30ഓടെ വിദ്യാനഗർ കെഎസ്ഇബി സബ്സ്റ്റേഷന്റെ സമീപത്ത് റോഡരികിൽ കൂട്ടിയിട്ടിരുന്ന കേബിളുകളിലാണ് തീപിടിത്തം ഉണ്ടായത്. വൈദ്യുതലൈനിൽ നിന്നു വീണ തീപ്പൊരി കേബിളുകളിലേക്ക് പടർന്നതോടെയാണ് സംഭവം.
തീപിടിത്തത്തിൽ കെഎസ്ഇബിയുടെ 600 മീറ്റർ ഭൂഗർഭ കേബിൾ പീസുകളും കെ-ഫോണിനായി ജില്ലയിൽ വിവിധ സ്ഥലങ്ങളിൽ സ്ഥാപിക്കാൻ കൊണ്ടുവന്നിരുന്ന 97,000 മീറ്റർ ഓപ്റ്റിക്കൽ ഫൈബർ കേബിളുകളും കത്തിനശിച്ചു.
സംഭവം കണ്ട സമീപവാസികൾ ഉടൻ തന്നെ കാസർഗോഡ് അഗ്നിരക്ഷാ സേനയെ വിവരം അറിയിക്കുകയായിരുന്നു.
സീനിയർ ഫയർ ആൻഡ് റെസ്ക്യൂ ഓഫീസർ വി.എൻ. വേണുഗോപാലിന്റെ നേതൃത്വത്തിൽ രണ്ട് യൂണിറ്റ് ഫയർഫോഴ്സ് വാഹനങ്ങൾ സ്ഥലത്തെത്തി.
ജെസിബിയുടെ സഹായത്തോടെ കേബിളുകൾ നീക്കി മാറ്റി വെള്ളമൊഴിച്ചാണ് രണ്ട് മണിക്കൂർ നീണ്ട പരിശ്രമത്തിനൊടുവിൽ തീ പൂർണമായും നിയന്ത്രണ വിധേയമാക്കിയത്.
സംഭവത്തിൽ കെഎസ്ഇബിക്ക് ഏകദേശം 10 ലക്ഷം രൂപയുടെ നഷ്ടം സംഭവിച്ചതായി അസിസ്റ്റന്റ് എക്സിക്യൂട്ടീവ് എൻജിനീയർ ഗായത്രി അറിയിച്ചു.
അതേസമയം, കെ-ഫോണിന്റെ ഏകദേശം 55 ലക്ഷം രൂപയുടെ കേബിളുകൾ കത്തിനശിച്ചതായി കെ-ഫോൺ സൂപ്പർവൈസർ രാധാകൃഷ്ണൻ അറിയിച്ചു.
ഇതോടെ സംഭവത്തിൽ അരക്കോടിയിലേറെ രൂപയുടെ ആകെ നഷ്ടമാണ് ഉണ്ടായിരിക്കുന്നത്.
