പാലക്കാട് ദാരുണ അപകടം: ബസും സ്കൂട്ടറും കൂട്ടിയിടിച്ച് യുവതി മരിച്ചു, കുട്ടി രക്ഷപ്പെട്ടു
പാലക്കാട്: പാലക്കാട് ജില്ലയിലെ കുളപ്പുള്ളി – വാണിയംകുളം പാതിപ്പാറയിൽ ബസും സ്കൂട്ടറും കൂട്ടിയിടിച്ച് നടന്ന അപകടത്തിൽ യുവതി മരിച്ചു. വാടാനാംകുറുശ്ശി സ്വദേശിനിയായ 41കാരിയായ ദിവ്യയാണ് അപകടത്തിൽ മരിച്ചത്.
വ്യാഴാഴ്ച വൈകുന്നേരം ഏഴുമണിക്ക് ശേഷമാണ് അപകടം ഉണ്ടായത്. തൃശ്ശൂരിൽ നിന്ന് ഒറ്റപ്പാലത്തേക്ക് പോവുകയായിരുന്ന ബിനി എന്ന സ്വകാര്യ ബസ് എതിർദിശയിൽ വരികയായിരുന്ന സ്കൂട്ടറിനെ ഇടിച്ചുതെറിപ്പിക്കുകയായിരുന്നു. സ്കൂട്ടറിൽ യുവതിയോടൊപ്പം ഒരു കുട്ടിയും ഉണ്ടായിരുന്നു.
അപകടത്തിൽ ഗുരുതരമായി പരിക്കേറ്റ ദിവ്യയെ സമീപത്തെ ആശുപത്രിയിലേക്ക് എത്തിച്ചെങ്കിലും ജീവൻ രക്ഷിക്കാനായില്ല. എന്നാൽ സ്കൂട്ടറിൽ ഉണ്ടായിരുന്ന കുട്ടി തലനാരിഴയ്ക്ക് പരിക്കുകളില്ലാതെ രക്ഷപ്പെട്ടു.
അപകടത്തിന് പിന്നാലെ നാട്ടുകാർ ശക്തമായ പ്രതിഷേധവുമായി രംഗത്തെത്തി. സ്വകാര്യ ബസുകൾ പാതയിൽ തടഞ്ഞിട്ട് പ്രതിഷേധം നടത്തുകയും ചെയ്തു. ഇതോടെ പ്രദേശത്ത് മണിക്കൂറുകളോളം ഗതാഗതക്കുരുക്ക് അനുഭവപ്പെട്ടു.
പോലീസ് സ്ഥലത്തെത്തി പ്രതിഷേധക്കാരുമായി സംസാരിച്ചശേഷമാണ് സ്ഥിതി നിയന്ത്രണ വിധേയമായത്. പിന്നീട് ഗതാഗതം സാധാരണ നിലയിലായി.
അപകടത്തിന്റെ കാരണം കണ്ടെത്താൻ പൊലീസ് അന്വേഷണം ആരംഭിച്ചിട്ടുണ്ട്. ബസിന്റെ വേഗതയും റോഡിലെ സാഹചര്യമുമാണ് അപകടത്തിന് കാരണമായതോ എന്നതടക്കമുള്ള കാര്യങ്ങൾ പരിശോധിച്ചുവരികയാണ്.
