ഭാര്യയെ കൊന്ന് ആത്മഹത്യയായി കെട്ടിത്തൂക്കി; ഒന്നര വർഷത്തിന് ശേഷം ഭർത്താവും ക്വട്ടേഷൻ സംഘവും പിടിയിൽ
കാമുകിയോടൊപ്പം ജീവിക്കാൻ വേണ്ടി ഭാര്യയെ കൊന്ന് ആത്മഹത്യയായി കെട്ടിത്തൂക്കിയ ഭർത്താവും ക്വട്ടേഷൻ സംഘവും ഒന്നര വർഷത്തിന് ശേഷം പോലീസിന്റെ പിടിയിലായി. ആദ്യം ആത്മഹത്യയായി കരുതിയിരുന്ന കേസിലാണ് ഭർത്താവും കൂട്ടാളികളും ഒടുവിൽ അറസ്റ്റിലായത്.
മുംബൈയിൽ താമസിക്കുന്ന സകറാം എന്ന വ്യക്തിയാണ് ഭാര്യ ഗീത ചൗധരിയെ കൊല്ലാൻ ഗൂഢാലോചന നടത്തിയതെന്ന് പോലീസ് വ്യക്തമാക്കി. കേസിൽ സകറാമിനൊപ്പം ശങ്കർ ഡാങ്കി, ബാബു, ദിനേശ് ഗയ്‌രി എന്നിവരെയും അറസ്റ്റ് ചെയ്തു.പോലീസ് അന്വേഷണത്തിൽ കണ്ടെത്തിയത്, സകറാം ഡിംപിൾ ചൗധരി എന്ന യുവതിയുമായി പ്രണയത്തിലായിരുന്നുവെന്നാണ്. അവളോടൊപ്പം ജീവിക്കണമെന്ന ആഗ്രഹമാണ് ഭാര്യയെ ഇല്ലാതാക്കാനുള്ള തീരുമാനത്തിലേക്ക് ഇയാളെ നയിച്ചത്.
ഭാര്യ ഗീതയെ കൊലപ്പെടുത്താൻ സകറാം രണ്ട് തവണ മുൻപ് ശ്രമിച്ചിരുന്നുവെന്നും അന്വേഷണത്തിൽ വ്യക്തമായി.
ആദ്യ ശ്രമത്തിൽ റോഡപകടം സൃഷ്ടിക്കാനും രണ്ടാമത്തെ ശ്രമത്തിൽ നേരിട്ട് ആക്രമിച്ച് കൊല്ലാനുമാണ് ഇയാൾ ശ്രമിച്ചത്. എന്നാൽ ഈ ശ്രമങ്ങൾ രണ്ടും പരാജയപ്പെട്ടു.
ഇതിന് പിന്നാലെ സകറാം തന്റെ സുഹൃത്ത് ശങ്കർ ഡാങ്കിക്ക് 6.7 ലക്ഷം രൂപ നൽകിയാണ് ക്വട്ടേഷൻ സംഘത്തെ ഏർപ്പാടാക്കിയത്. ശങ്കർ ഡാങ്കി പിന്നീട് ബാബുവിനെയും ദിനേശ് ഗയ്‌രിയെയും ചേർത്ത് കൊലപാതകം നടപ്പാക്കുകയായിരുന്നു.
ഗീതയെ ശ്വാസംമുട്ടിച്ച് കൊലപ്പെടുത്തിയ ശേഷം ആത്മഹത്യയായി കാണിക്കാൻ മൃതദേഹം അടുക്കളയിലെ സീലിങ് ഫാനിൽ കെട്ടിത്തൂക്കുകയായിരുന്നു.
2024 ഒക്ടോബർ 14-നാണ് ഗീതയെ വീട്ടിലെ സീലിങ് ഫാനിൽ തൂങ്ങിമരിച്ച നിലയിൽ കണ്ടെത്തിയത്. ലഭ്യമായ തെളിവുകളുടെ അടിസ്ഥാനത്തിൽ പോലീസ് ആദ്യം ഇത് ആത്മഹത്യയായി കരുതി കേസ് രജിസ്റ്റർ ചെയ്തു.
പോസ്റ്റ്‌മോർട്ടം റിപ്പോർട്ടിലും മരണകാരണം വ്യക്തമായി കൊലപാതകമാണെന്ന് കണ്ടെത്താനായിരുന്നില്ല. തുടർന്ന് മൃതദേഹം അന്ത്യകർമങ്ങൾക്ക് രാജസ്ഥാനിലേക്ക് കൊണ്ടുപോയി.
എന്നാൽ മകൾ ആത്മഹത്യ ചെയ്തുവെന്ന് വിശ്വസിക്കാൻ പിതാവ് ഭനറാം ചൗധരിക്ക് കഴിഞ്ഞില്ല. ഇത് കൊലപാതകമാണെന്ന് സംശയിച്ച അദ്ദേഹം രാജസ്ഥാൻ പോലീസിൽ പരാതി നൽകി.
തുടർന്ന് കേസിന്റെ പുനരന്വേഷണം ആരംഭിക്കുകയും ഗീതയുടെ മൃതദേഹം പുറത്തെടുത്ത് വീണ്ടും പോസ്റ്റ്‌മോർട്ടം നടത്തുകയും ചെയ്തു.
ഈ പരിശോധനയിൽ ഗീതയെ ശ്വാസംമുട്ടിച്ച് കൊലപ്പെടുത്തിയതാണെന്ന് സ്ഥിരീകരിച്ചു.
തുടർന്ന് പോലീസ് സകറാമിനെ കസ്റ്റഡിയിലെടുത്ത് ചോദ്യം ചെയ്തു. തുടർച്ചയായി തെറ്റിദ്ധരിപ്പിക്കാൻ ശ്രമിച്ചെങ്കിലും ഒടുവിൽ സകറാം കുറ്റം സമ്മതിക്കുകയായിരുന്നു.
ഡിംപിൾ ചൗധരിയുമായി തനിക്ക് ബന്ധമുണ്ടെന്നും അവളോടൊപ്പം ജീവിക്കാൻ ഭാര്യയെ ഇല്ലാതാക്കാൻ തീരുമാനിച്ചതാണെന്നും ഇയാൾ വെളിപ്പെടുത്തി.
കേസിൽ ഭർത്താവ് സകറാം, ശങ്കർ ഡാങ്കി, ബാബു, ദിനേശ് ഗയ്‌രി എന്നിവരെ പോലീസ് അറസ്റ്റ് ചെയ്തു. കൂടുതൽ അന്വേഷണങ്ങൾ തുടരുകയാണ്.
