ക്ഷേത്രത്തിലെ പ്രീ-വെഡ്ഡിങ് ഷൂട്ട് വിവാദത്തിൽ കലാശിച്ചു; ക്യാമറമാന്മാർക്ക് പരിക്ക്, 7 പേർ അറസ്റ്റിൽ
കർണാടകയിലെ സക്‌ലേശ്പുരിലെ ഭേട്ടട ഭൈരവേശ്വര ക്ഷേത്രവളപ്പിൽ പ്രീ-വെഡ്ഡിങ് ഷൂട്ടിനിടെ ഉണ്ടായ സംഘർഷത്തിൽ രണ്ട് ക്യാമറമാന്മാർക്ക് പരിക്കേറ്റു. സംഭവവുമായി ബന്ധപ്പെട്ട് പോലീസ് ഏഴുപേരെ അറസ്റ്റ് ചെയ്തു.
റിപ്പോർട്ടുകൾ പ്രകാരം, ക്ഷേത്രവളപ്പിൽ പ്രീ-വെഡ്ഡിങ് ഷൂട്ട് നടത്തുന്നതിനിടെ നാട്ടുകാരും ക്യാമറമാന്മാരും തമ്മിൽ വാക്കുതർക്കം ഉണ്ടാകുകയായിരുന്നു. ക്യാമറമാന്മാർ ചെരിപ്പ് ധരിച്ച് ക്ഷേത്രവളപ്പിൽ പ്രവേശിച്ചതും ക്ഷേത്രത്തിനുള്ളിൽ ചിത്രീകരണം നടത്തിയതുമാണ് ചിലർ ചോദ്യം ചെയ്തത്. ഇതിനെ തുടർന്നാണ് ആദ്യം വാക്കേറ്റം ഉണ്ടായത്.
തർക്കം പിന്നീട് സംഘർഷത്തിലേക്ക് മാറി. നാട്ടുകാരുടെ ആക്രമണത്തിൽ ക്യാമറമാന്മാരായ നവി, നന്ദൻ എന്നിവർക്ക് പരിക്കേറ്റു. സംഘർഷത്തിനിടെ ഒരു ക്യാമറയും തകർന്നതായി റിപ്പോർട്ടുകളുണ്ട്.
പരിക്കേറ്റ ഇരുവരെയും പിന്നീട് സക്‌ലേശ്പുർ താലൂക്ക് ആശുപത്രിയിൽ പ്രവേശിപ്പിച്ചു. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.
സംഭവവുമായി ബന്ധപ്പെട്ട് ആഷി, പ്രശാന്ത്, രക്ഷ, അരവിന്ദ്, ഉചിത്, പ്രജ്വൽ, നിഷാന്ത് എന്നിവരെ പോലീസ് അറസ്റ്റ് ചെയ്തതായി അധികൃതർ അറിയിച്ചു.
സംഭവം പ്രദേശത്ത് വലിയ ചർച്ചയായിരിക്കുകയാണ്. ക്ഷേത്രപരിസരങ്ങളിൽ ചിത്രീകരണവുമായി ബന്ധപ്പെട്ട നിയമങ്ങൾ പാലിക്കണമെന്ന ആവശ്യവും ഇതോടെ വീണ്ടും ഉയർന്നിരിക്കുകയാണ്.
